بقلم المبدع / وائل سعيد

يا تكتك يامتكتك
وبتكتك فى كل مكان
مصنوع و بتكتك
وتقلق الإنسان
شقى وابن موت
سريع فى القلبان
مصنوع من البسكوت
سريع فى الذوبان
ركبتك وقلت افوت
انا وعلتى كمان
فجأة سمعت صوت
ندهت يا سطى فلان
العجل مش مزبوط
بيتكتك مع الدوران
قال رومان مفروط
واياك تكون قلقان
رديت بعد سكوت
خطر على الأبدان
ضحك وقال مفروط
بس احنا برضو أمان
جرى كأنه حوت
مطلوق من الحرمان
وكل ما يجرى الصوت
يتكتك كمان وكمان
يادوب قلت مريوم
ممكن يكون قلبان
قلت بغيظ مكتوم
ممكن وفى المليان
قال الجميع مريوم
ربك كريم منان
يسترها معانا اليوم
والبركة فى اسطى فلان
خلص الكلام والزوم
فجأة بدأ ميلان
تكتكنا بقى مسطول
يحدف يمين وشمال
قلت بصوت مشلول
بالراحة يا اسطى فلان
خليك يمين وبطول
لحد ما نبقى أمان
نزل الجميع مزهول
والاسطى فى التوهان
بلف هنا ويدور
أتارى العجل هربان
دم الحديد بيفور
من الإل والإهمال
بلية بكام هلفوت
فداها كام إنسان
تكتك جلب هلفوت
بيدمر الغلبان
وأقولها بأعلى صوت
الستر م الرحمن
......وائل سعيد........