بقلم الأديب المبدع / محمد المؤذن

انا بنادم كنت منعادم
من لوجود قبل تسعود
بوي كرمو لمعبود
ليه أمر ملايكتو بالسجود
من البحر رزق موفر
عيون السحاب
بالدموع تغرغر بشمس الظهر
تنزل قطرة قطرة في لبر
تسقي نجود تعمر سدود 
أنا بغيت حقي
من أرض ربي قيمتو عود
بحال حقي من نور ربي
فيه معاشي موعود
بحال حقي من الظلام
نحط راسي نرقد رقود
بحال حقي من الما ولهوا
بين لرض والسما
بحال حقي في الشوف
نشرب ونعمر لجوف
بلا خوف نشم ورود
بحال حقي منقي من بحري
بصنارة وشبكة نبذل مجهود
بحال حقي من الزمان
نمرض نتشافى نتعافى
نعيش عمري لمحدود
علاش اخوي ولد بوي
حكرتيني كيلتيني لحقود
وش أنا من تراب
وانت من ذهب مرصود
راعي راه دم لخدود محدود
مصيرنا شبر من التراب في  لحود
علاش مكبر علاش مجبر علاش تكفر
الدنيا لك ما دايمة
تغرك بهمها بك تغدر
بونا بدا الرحلة بعد الزلة
ذاق من ذيك الشجرة غلة
مدفوع بالشيطان لمنكر 
رحلة في الزمان ولمكان
فوق كرة ما فايتة دقة إبرة من لكوان
رحلة انسان حفيان
جرح قدام لمخ من تعثار التخمام
عطى برهان
جرد سيفو على حكرة الصر ولحر
بنى دشر  دور حيطان
تخاو القلب ولعقل الولهان
اللخر  سول واللول حضر ليمان
الزمان قسح قلوب
كثرت الذنوب ببهوت الشيطان
الشر فات لقدر هز كتافو تجبر 
في ميدان الزمان غلبو لخير
كان فارس من الشجعان
بغيت حقي من العلم
نجرد لقلم سيف بتار نحارب الظلم
انت قلت
اللي ما عندو فلوس كلامو مسوس
وانا قلت يخطاك العلم في الهم
تبقى محبوس
فمك مكمم وعقلك ملجم 
العلم في الريوس يعيش النفوس
يجبد شحمة لرض بالسنة ولفرض
خير لبلاد عل لعباد يتقسم 
بغيت حقي من فلاطون وبن خلدون
من سيبويه وبن رشد نعرف لفنون
وسرار الكون ما نكونش حي بن يقظان
نتلاح في غابة من حقي محرم
بغيت حقي اللي في اللوح مزمم
من ظلام الرحم حتى نتوفى ونتردم
بويا آدم في السما بالعلم تكرم
نطق نادى الملائكة كل واحد بإسم

محمد المؤذن مؤسس ورئيس جمعية كازابلانكا للتراث الشعبي