بقلم الأديب الشاعر/ محمد المؤذن

في السويقة من الحلقة
سمعت الرش دقة دقة
طليت نسرق الشوفة سرقة 
شفت بوهالي بالعلالي
يقيس لكلام
لابس دربالة ماهي سلهام
مرقعة خرقة  على خرقة
سمعت منو كلمة محقة
حرقت قلبي حرقة
قال بعدما صال وجال
سمعو كلامي يا رجال
 النعاس عندو  قياس 
شمسنا طلعت وداز الحال 
شرقت في الوقت سبقها فجر   
بعدو ظهر وعاصر
جا المغرب عطات بالظهر
حنا في الشرق قلنا غربت
وهي شرقت في بلاد لغدر 
نورها خاذو منو شعار ورمز
شرق العز عجز والغرب قفز
عرى على كمامو من شحال 
يالطيف يا لطيف
مال الشرق عايش في الهيف
في الأيام العوجا بتاغونجا 
يطلب الشتا في الصيف
أرضنا بالتحريف والخريف 
ريشوها دجاجة
وكحو بيارها نتفوها نتيف
على كانة الغرب عايشين بالسيف 
اللي هز الراس دواه قرطاس 
يبينو ليه الرباح ملثم بزيف نظيف 
ذبحو الحشمة والهمة في ساحة الغمة
دفنو لحيا في الكدية
قبرو بلا شاهد مجهول
ما يزوروه حباب اصبح مغفول
اللي قال حشومة يردوه مدلول
كلمة الغرب مسموعة
ردونا ضبوعة
بنياب خوتنا رهبونا
ولاو سبوعة  فين المعقول
يا الغادي للمدرسة
سبولة الدراسة عطشانة
ما تامرة خاوية ما راوية
ترمي نفسك في الهاوية
وتعيس في التعاسة
تقرا ما تربح بالبطالة تفرح
تلوح الكراسة تصبح مغلول 
ولدهم  بالدعم ما هز هم خدم 
أصبح مقبول يصول ويجول
الغرب برلمان وحكومة
الديمقراطية ملزومة
النفوس حقها ملموس
مامظلومة لبلاد مخدومة
وحنا نفوسنا بالتبعية مكلومة 
غرونا بحضارة ملغومة
جردونا من كرامة
في كتاب الله معلومة
بردعنا مركب الموت
لجمناه بلجام الغوث
قصدناهم بعدما فات الفوت
عشنا القهرة خدمنا بالسومة 
حتى لاين يا شرق
من خيرنا ورزاقنا تنفق بلا حق 
على سلاح مصدي صنعو لغرب
به تضرب خوتك لعرب
دق تابع دق ناوي تلحق بلا عرق
يا شرق جمع راسك علاش تخرب
علاش انت  في ارضك مغرب
علاش تسفك الدم بلا ذنب
رجع للكتاب اسمع كلام الرب 

محمد المؤذن مؤسس ورئيس جمعية كازابلانكا للتراث الشعبي