بقلم الأديب الشاعر / عادل أبو زيد

ست الحزن         

مالك ؟
 وسايبه الحزن ليه
ياخد  جمالك ؟
حتى الدموع
حفرت ف خدك سكتين
بتبكي مين؟
 ولا حاجة في الدنيا دي
تسوى دمعتين
ولا حد  يستاهل كده؟
وحتى لو متأكده
أن اللي راح
 كان شيئ جميل
الكاس خلاص
بقى ألف حته
والرجوع بقى مستحيل
وحبستي شمسك
في دولاب الذكريات
وحبستي نفسك
جوه أوضه مضلّمه
والليل طويل
والدمع نازل
من عيوك كالمطر
وعملتي من دمعك سبيل
لولا انه مالح
كان روى كل البشر
أكبر خطر
نحط نقطة
 بعد حزن في قلبنا
ونقول تمام
قِضيت كده ومات الكلام
بقى ده كلام ؟
اللي طموحه في  الحياة
انه يموت
 انسان غبي
آسف واوعي تغضبي
ولا م الحقيقة تهربي
دا الأمر واقع
 هو انتي كائن رخوي
هربان في القواقع؟
كوني فراشة مذوقة
يالله اخرجي م الشرنقة
عمر الفراشة مش سنين
سيبك من الاحزان بقى
وعيشي يومين
عادل أبو زيد